meri us shaam ke taare se mulaqat bahut gahri thi
vo mira ham-dam-e-derina tha
main bahut chhoti thi jab maan ne bataya tha mujhe
”dekho dekho vo udhar vo miri ungli ke qarib
ek taara bhi tumhen dekhta hai”
un dinon jab main havaon ki tarah udti thi
aur daali ki tarah jhuum ke lahrati thi
raat aur din ke lipatne ki ghadi aate hi
sirf us taare ki khatir main thahar jaati thi
vo mujhe dekhta tha
main bhi use dekhti thi
vo mujhe dhundhta tha
main bhi use dhundhti thi
aur us id-e-mulaqat ke baad
roz ham donon bichhad jaate the
apni manzil ki taraf vo bhi chala jaata tha
apne raston ki taraf men bhi palat aati thi
meri us shaam ke taare se mulaqat bahut gahri thi
main ne taare ki rifaqat men shagun kitne liye
aaj dekha nahin taara main ne
aaj ki shaam jo roz aata hai shayad nahin aae
rasta bhuul na jaae
aaj to jald nikal aaya hai taara mera
aaj ki raat mulaqat milegi mujh ko
an-kahe lafzon ki saughat milegi mujh ko
main ne taare ki rifaqat men shagun kitne liye
ab main tanha huun
baras biit gae hain kitne
koi taara nahin dekha main ne
duur ki chiiz zara dhundli nazar aati hai
meri khvabida samaat ko jagane ke liye
sirf avaz-e-azan aati hai
ab shagun kaahe se luun
kis ke aane ki umiden bandhun
kis ke jaane se pareshan rahun
kal magar phone ki ghanti ne mujhe
apne mahaul se bedar kiya
zindagi se mujhe do-char kiya
ek amrit bhara lahja mire kanon men ghula
”amman kal shaam dikhaya ham ne
apne bachchon ko chamakta tara”
”kaun sa taara dikhaya tum ne”
”aap ka shaam ka pahla tara”
phone jab khatm hua
vaqt dinon hi gale milte the
main ne khidki se hataya parda
asman hadd-e-nazar tak varaq-e-sada tha
na shafaq thi na ufuq par hi koi taara tha
yak-ba-yak ek kiran chehre par lahrane lagi
duur ki chiiz zara dhundli nazar aati hai
mera taara meri palkon par utar aaya tha
main ne ungli ke sahare se use thaam liya
apne anchal men use bandh liya
bhala is umr men ye saath kise milta hai
meri us shaam ke taare se mulaqat bahut gahri thi
…..mira hamdam-e-derina tha
Leave a Reply