shah-e-rag se bhi tu qarib hai tira ye karam hai kamal hai
ye jo ḳhaak men bhi hai raushni tira aks-e-ru-e-jamal hai
ise chahaton ka kahun asar ki tu saath mere hai har Dagar
main jahan jahan bhi karun nazar tira husn hai be-misal hai
main to ḳhaak huun vo tah-e-zamin mira hai nasib fana jaza
tire taj-e-shahi ki baat kya na fana use na zaval hai
yahi ishq aisi hai rahguzar hai bahut kaThin jo ai ham-safar
na rakhen sambhal ke qadam agar chale vaqt ulTi hi chaal hai
tire qurb men bhi hain duriyan tira kuchh ajab sa suluk hai
vo sukun jo tha tire qurb men vahi aaj ḳhvab-o-ḳhayal hai
vo rafiq kitna badal gaya na kare hai zikr kabhi mira
use kya hua use kya hua mire zehn men ye saval hai
vo shararten vahi shoḳhiyan mire ahd-e-tifl ke qahqahe
kahin kho ga.e mire rat-din isi baat ka to malal hai
vo Dari Dari si mohabbaten ki hain yaad mujh ko vo sa.aten
vo jo chahaton men thiin lazzaten vo ḳhayal-e-jan ka vabal hai
usi charagar ki talash hai kare manzilon ko jo ru-ba-ru
usi rahnuma ki hai justuju usi rahbar ka saval hai
Leave a Reply