Seema Naqvi
sanehe laakh sahi ham pe guzarne vaale
rasto ham bhi nahin Dar ke Thaharne vaale
marne vaale koi aur sabab DhunD ki ham
maare jaane ke to Dar se nahin marne vaale
kitni jaldi men hua ḳhatm mulaqat ka vaqt
varna kya kya na savalat the karne vaale
guftugu ḳhud se hui apne hi haq men varna
sach se is baar to ham bhi the mukarne vaale
zindagi apni tamasha hi sahi lekin ham
koi kirdar musalsal nahin karne vaale
ek kaghaz ke bharose pe bana kar kashti
gahre paani men utarte hain utarne vaale
pyaas bhaḌka.en jahan sirf ravayyon ke sarab
ham bhi is dasht men paanv nahin dharne vaale
ham men kyuun baat kabhi ho nahin paati ‘sima’
ham kisi roz yahi baat the karne vaale
Leave a Reply