Rakhta Hun Main Haq Par Nazar Koi Kuchh Kaho Koi Kuchh Kaho

Poet

rakhta huun main haq par nazar koi kuchh kaho koi kuchh kaho

hushyar huun ya be-ḳhabar koi kuchh kaho koi kuchh kaho

qismat muqaddar buujh kar ghaflat men aa kar hirs se

phir kya hai phirna dar-ba-dar koi kuchh kaho koi kuchh kaho

juz ma.asiyat ke kuchh nahin hai kaam mujh aasi ke ta.iin

har roz o har shaam o sahar koi kuchh kaho koi kuchh kaho

kuchh nek o bad kahne ka ab ḳhatra nahin hai ḳhalq ka

yaksan kiya naf o zarar koi kuchh kaho koi kuchh kaho

hai chaar din ki zindagi ḳhush rah ke aḳhir ke ta.iin

duniya se jaana hai guzar koi kuchh kaho koi kuchh kaho

‘hatim’ tavaqqo.a chhoḌ kar aalam men ta shaah o gada

aa kar laga haidar ke dar koi kuchh kaho koi kuchh kaho