rah-e-junun pe chal pare jiina muhal kar liya
ham ne talash-e-husn men ḳhud ko niDhal kar liya
mujh ko to ḳhair chhoḌiye meri to baat aur thi
ye bhi bahut hai us ne kuchh apna ḳhayal kar liya
kaise vo din the pyaar ke ḳhud pe bhi jab yaqin tha
pal men juda.i Daal li pal men visal kar liya
jaise rahe hain vasl men marte rahe hain hijr men
ye bhi kamal kar liya vo bhi kamal kar liya
apni bhi kuchh ḳhabar nahin dil ki bhi kuchh ḳhabar nahin
ham ne tumhare hijr men kaisa ye haal kar liya
Leave a Reply