hatim-ali-mehr

Puchhega Jo Wo Rashk-E-Qamar Haal Hamara

puchhega jo vo rashk-e-qamar haal hamara

ai ‘mehr’ chamak jaega iqbal hamara

saude men tiri zulf ke likhte hain jo ashar

hota hai siyah nama-e-aamal hamara

abru ka ishara kiya tum ne to hui iid

ai jaan yahi hai mah-e-shavval hamara

har baar dikhata hai junun khana-e-zanjir

is ghar men guzara hua har saal hamara

aate hi vo kahte hain ki jaate hain bas ab ham

be-chain hain mangvaiye sukh-pal hamara

mazmun na bandha mu-e-kamar ka to vo bole

tedha na hua shairon se baal hamara

mahtab se kahta hai mira chand ka tukda

rukhsar tira saaf hai ya gaal hamara

tum arsh hilate ho qadam rakh ke zamin par

is chaal se dil ho gaya pamal hamara

ik pal bhi juda dida-e-tar se nahin hota

ab aankh ka parda hua rumal hamara

yaan ruuh pe hota hai us avaz ka sadma

ji lega shab-e-vasl men ghadiyal hamara

yaan ganj-e-maani hai to vaan sim-o-zar ai ‘mehr’

daulat vo bakhilon ki hai ye maal hamara

More Poems

Leave a Comment