paaya jab se zaḳhm kisi ko khone ka
sikha fan ham ne be-ansu rone ka
baḌon ne us ko chhin liya hai bachchon se
ḳhabar nahin ab kya ho haal khilaune ka
ham-safaron se tark-e-safar ko kahta huun
Dar hai raah men aisi baten hone ka
ro dena bhi majburi to hai lekin
lutf alag hai dil men aansu bone ka
miThe ḳhvab bhi ham dekhen gar mausam ho
lambi gahri miThi ninden sone ka
mere liye kya mere dam-e-aḳhir tak hai
khel ye saara hone aur na hone ka
Leave a Reply