Gulzar Dehlvi
pahle to dam-e-zulf men uljha liya mujhe
bhule se phir kabhi na dilasa diya mujhe
kya dardnak manzar-e-kashti tha ruud men
main na-ḳhuda ko dekh raha tha ḳhuda mujhe
baiTha hua hai rashk-e-masiha mire qarib
kas bebasi se dekh rahi hai qaza mujhe
un ka bayan meri zaban par jo aa gaya
lahje ne un ke kar diya kya ḳhush-nava mujhe
jin ko rahi sada mire marne ki aarzu
jiine ki de rahe hain vahi ab dua mujhe
jaane ka vaqt aaya to aa.i sada-e-haq
muddat se aarzu thi mile ham-nava mujhe
har bam-o-dar se ek ishara hai roz-o-shab
ne main vafa ko chhoḌ saka ne vafa mujhe
duniya ne kitne mujh ko dikha.e hain sabz baagh
un se na koi kar saka lekin juda mujhe
ḳhushbu se kis ki mahak rahe hain masham-e-jan
daman se de raha hai koi to hava mujhe
tasvir us ke haath men lab par miri ghazal
dekha na ek aankh na jis ne suna mujhe
fard-e-amal men meri hon shamil sab un ke jaur
un ke kiye ki shauq se diije saza mujhe
meri vafa ka un ko mile hashr men sila
mil jaa.en un ke naam ke jaur-o-jafa mujhe
har roz mujh ko apna badalna paḌa javab
roz ik sabaq paḌhata hai qasid naya mujhe
dekha tumhari shakl men husn-e-azal ki zau
sajda tumhare dar pe hua hai rava mujhe
jhonka koi nasim ka ‘gulzar’-e-naz men
un ka payam kaash suna.e saba mujhe
Leave a Reply