Numud-E-Sham Jo Tira-Shabi Bhi Deti Hai

Poet

numud-e-sham jo tira-shabi bhi deti hai

ba-iḳhtitam-e-safar raushni bhi deti hai

ye baat ahl-e-ḳhirad ki samajh men aa na saki

junun ki be-ḳhabari agahi bhi deti hai

bahut hi ḳhuub hai yaaro ḳhulus-e-dil-daran

ajiib azm magar bekasi bhi deti hai

sukut-e-saz men ahang-e-dard-e-dil muzmar

sada-e-karb kabhi ḳhamushi bhi deti hai

nishan-e-jada-e-manzil ba-rah-ravan-e-vafa

shab-e-siyah men ḳhud tirgi bhi deti hai

vo ek sa.ad-e-simin vo ek mah-jabin

sukun-e-qalb ko ashuftagi bhi deti hai

ye kah rahi thi nasim-e-sahar kanar-e-furat

zamin-e-qatl-e-vafa zindagi bhi deti hai