Nind Aankhon Se Udi Phul Se Khushbu Ki Tarah

niind ankhon se udi phuul se khushbu ki tarah

ji bahal jaega shab se tire gesu ki tarah

dosto jashn manao ki bahar aai hai

phuul girte hain har ik shakh se aansu ki tarah

meri ashuftagi-e-shauq men ik husn bhi hai

tere aariz pe machalte hue gesu ki tarah

ab tire hijr men lazzat na tire vasl men lutf

in dinon ziist hai thahre hue aansu ki tarah

zindagi ki yahi qimat hai ki arzan ho jaao

naghma-e-dard liye mauja-e-khushbu ki tarah

kis ko maalum nahin kaun tha vo shakhs ‘alim’

jis ki khatir rahe avara ham aahu ki tarah

Leave a Comment