Nim Jaisa Mera Lahja Aur Wo miTha Bahut

niim jaisā merā lahja aur vo mīThā bahut

phir bhī us ne dostī ke naam par jhelā bahut

ek sūraj merī chhat par dhuup lene aa gayā

lag rahā hai aaj kā din is liye ujlā bahut

chheḌ detī hai tumhārī yaad koī giit phir

dil meñ jab bhī gūñjne lagtā hai sannāTā bahut

chāñd hai paanī meñ utrā aur maiñ bechain huuñ

haath meñ rassī hai chhoTī aur kuaañ gahrā bahut

Leave a Comment