nikalo koi to surat ki tirgi kam ho
hamara ghar hi jala do jo raushni kam ho
hamare ahd ko raas aa ga.i vo bad-e-sumum
ki jis men maut ziyada ho zindagi kam ho
zamane kaise tujhe apni raah par laa.e
ham ahl-e-ishq ki kaise ye bebasi kam ho
kisi tarah to numa.ish ka ye nasha utre
kisi tarah to dikhave ki zindagi kam ho
ye kya hamesha vafa-o-ḳhulus ki baten
kuchh aisi baat karo jo kahi suni kam ho
koi jatan to karo dosto bulao use
miri nigah ki us ki ye pyaas hi kam ho
tumhara mera ye rishta ajiib hai ki jahan
na dosti hi ghaTe aur na dushmani kam ho
Leave a Reply