Basit Bhopali
nahin ye jalva-ha-e-raz-e-irfan dekhne vaale
tumhen kab dekhte hain kufr-o-iman dekhne vaale
ḳhuda rakkhe tire gham ka bahut nazuk zamana hai
sahar dekhen na dekhen sham-e-hijran dekhne vaale
ye kis ne la ke rakh di samne tasvir mahshar ki
abhi chaunke hi the ḳhvab-e-pareshan dekhne vaale
kahan tak a.ina-dar-e-tajalliyat-e-ḳhud-bini
ye parda bhi ulaT de o dil-o-jan dekhne vaale
ye divane sujud-e-shauq ki azmat ko kya janen
mujhe kya paa.en farq-e-kufr-o-iman dekhne vaale
kabhi girdab se bhi khel maujon se bhi Takra ja
are sahil pe rah kar josh-e-tufan dekhne vaale
tire qurban ‘basit’ aur ‘basit’ ki har ik duniya
bahar-e-vahshat-e-ashufta-halan dekhne vaale
Leave a Reply