na talafiyan hi mangen na vafa na pyaar mangen
chalo aaj us se khoya hua e’tibar mangen
tire shahr men hamesha yahi qillaten sahi hain
kabhi us se tauq mangen kabhi us se daad mangen
tire ahd men na jiina tire ahd men na marna
hamen iḳhtiyar ho to koi iḳhtiyar mangen
tiri be-ruḳhi ke sadqe tiri be-ruḳhi nahin hai
yahi to hai vo ada jo tire jan-nisar mangen
kahin yuun na ho ki kal ham gham-e-yar se bhi jaa.en
chalo aa rahi ruton se vahi intizar mangen
Leave a Reply