kishwar-naheed

Na Koi Rabt Ba-Juz Khamushi O Nafrat Ke

na koi rabt ba-juz khamushi o nafrat ke

milenge ab to khulase yahi mohabbat ke

main qaid-e-jism men rusva tu qaid men meri

badan pe daagh liye qaid-e-be-saubat ke

ajiib baat gireban pe haath un ka hai

jo tosha-gir-e-tamanna the harf-e-ghairat ke

bas ab to harf-e-nadamat ko sabt-e-daem de

saba-sifat the risale gham-e-mohabbat ke

dua se tazkiya-e-nafas tak safar hai bahut

libas badloge kitne bhi ab zarurat ke

siyah safed ke malik ko farq-e-rang se kya

pade na us pe bhi sadme kabhi hazimat ke

zamam-e-kar-e-jahan kis ke haath hai ya-rab

badal gae hain taqaze bhi admiyat ke

zamana darpa-e-azar hai to kya ‘nahid’

bikharte aae hain moti sada mashaqqat ke

More Poems

Leave a Comment