Na Baam-O-Dasht Na Dariya Na Kohsar Mile

na bam-o-dasht na dariya na kohsar mile

junun ki raah thi halat sazgar mile

labon pe harf-e-shikayat bhi aa ke tuut gaya

vo khud figar the jo haath sang-bar mile

udhar fasil-e-shab-e-gham idhar hai shahr-e-panah

saba se kahiyo vahin aa ke ek baar mile

ye bebasi to mire ahd ka muqaddar thi

dilon ko dagh-e-tamanna bhi mustaar mile

hatheliyon pe charagh-e-dua sajae hue

mile nigar-e-baharan to sharmsar mile

koi to rah-e-tamanna men ham-safar hota

koi to ku-e-vafa men khata-shiar mile

mohabbaton se to pahle hi kya tavaqqo thi

muravvaton ke bhi daman taar taar mile

main kaise apne khadd-o-khal aaj pahchanun

jo aina mile aluda-e-ghubar mile

miri talab ki ye mearaj hai ki ijz ‘ada’

jidhar se guzrun vahi ek rahguzar mile

Leave a Comment