Dagh Dehlvi
mujh sa na de zamane ko parvardigar dil
ashufta dil farefta dil be-qarar dil
har baar mangti hain naya chashm-e-yar dil
ik dil ke kis tarah se banaun hazar dil
mashhur ho gai hai ziyarat shahid ki
khun-kushta aarzu ka bana hai mazar dil
ye said-gah-e-ishq hai thahraiye nigah
sayyad-e-muztarib se na hoga shikar dil
tufan-e-nuh bhi ho to mil jaae khaak men
allah re ghubar tira pur ghubar dil
puchha jo us ne talib-e-roz-e-jaza hai kaun
nikla miri zaban se be-ikhtiyar dil
karte ho ahd-e-vasl to itna rahe khayal
paiman se ziyada hai na-paedar dil
tasir-e-ishq ye hai tire ahd-e-husn men
mitti ka bhi banaen to ho be-qarar dil
us ki talash hai ki nazar aae aarzu
zalim ne roz chaak kiye hain hazar dil
aalam hua tamam raha us ko shauq-e-hur
barsae asman se parvardigar dil
pahle-pahal ki chaah ka kiije na imtihan
aana to siikh le abhi do-char baar dil
nikle miri baghal se vo aise tadap ke saath
yaad aa gaya mujhe vahin be-ikhtiyar dil
ai andalib tujh ko lage kab hava-e-ishq
kaliyon ki tarah tujh men na phute hazar dil
ashiq hue vo jaise adu par ye haal hai
rakh kah ke haath dekhte hain baar baar dil
us ne kaha hai sabr padega raqib ka
le aur be-qarar hua be-qarar dil
betab ho ke bazm se us ki utha diya
ghafil main huun magar hai bahut hoshyar dil
mashhur hain sikandar o jam ki nishaniyan
ai ‘dagh’ chhod jaenge ham yadgar dil
Leave a Reply