Mubarakbaad

zamane! tahniyat tujh ko

ki phir maidan maara hai

magar ab ke jo haara hai

bada hi sakht-jan nikla

muqabil tere aane ko bahut tayar phirta tha

liye hathiyar phirta tha

vafa ke, zarf ke

ankhon men raushan khush-gumani ke

labon par khelti khvahish,

sukhan men nachti ik hausla-mandi

ragon men daudta sayyal irada tha

badan par khvab ki pahne zira-baktar

jabin par be-niyazi khuud ki surat tikai thi

gira ke farsh par is ko

bada arsa laga tujh ko

ki is kashana-e-ummid bhi lams-e-zamin chakkhe

phir is ke baad

kitni der tak us ka

adam taslim-e-paspai men chillate hue rahna…

zamane tahniyat tujh ko

ki ab ki martaba jis ko pachhada hai

bada hi sakht-jan tha vo!!

Leave a Comment