Mohsin Asrar
miTTi ho kar ishq kiya hai ik dariya ki ravani se
divar-o-dar maang raha huun main bhi bahte paani se
be-ḳhabari men honT diye ki lau ko chumne vaale the
vo to achanak phuuT paḌi thi ḳhushbu raat ki raani se
vo majburi maut hai jis men kaase ko buniyad mile
pyaas ki shiddat jab baḌhti hai Dar lagta hai paani se
duniya valon ke mansube meri samajh men aa.e nahin
zinda rahna siikh raha huun ab ghar ki virani se
jaise tere darvaze tak dastak dene pahunche the
apne ghar bhi lauT ke aate ham itni asani se
ham ko sab ma.alum hai ‘mohsin’ haal pas-e-girdab hai kya
aankh ne sachche gur sikhe hain suraj ki darbani se
Leave a Reply