miri mohabbat bhi nilgun hai
main us ko dungi gulab niila
chamakte aariz ghata se gesu
hata diya hai naqab niila
falak se aage palak se aage
nazar men rakkha shahab niila
hai naghma ahang-e-zindagi bhi
hai saz-e-mauj-e-rabab niila
hare samundar ke paas jaun
to vo bhi nikle sarab niila
jo laal lafzon se khat likha tha
mujhe mila hai javab niila
hain zakhm saare hi niile niile
hai ye mohabbat azaab niila
rafaqaton ke safar se bojhal
main likh rahi huun nisab niila
Leave a Reply