mere honTon pe tere naam ki larzish to nahin
ye jo ankhon men chamak hai koi ḳhvahish to nahin
rang malbus hue lams hui hai ḳhush-bu
aaj phir shahr men phulon ki numa.ish to nahin
ek hi saans men dohra.e chale jaate hain
ye mohabbat kahin alfaz ki varzish to nahin
dekhta rahta huun chup-chap guzarte badal
ye ta.alluq bhi koi dhuup ki barish to nahin
tum kabhi ek nazar meri taraf bhi dekho
ik tavaqqo hi to hai koi guzarish to nahin
mil bhi jaa.en kahin ankhen to marammat na karen
ham men aisi koi talḳhi koi ranjish to nahin
Leave a Reply