ahmad-faraz

Mayurka

mayurka ke sahilon pe kis qadar gulab the

ki khushbuen thi be-tarah ki rang be-hisab the

tunuk-libasiyan shanavaron ki thiin qayamaten

tamam sim-tan sharik-e-jashn-e-shahr-e-ab the

shua-e-mahr ki ziya se the jigar jigar badan

qamar-jamal jin ke aks-e-raushni ke baab the

khuli faza ki dhuup vo ki jism sanvle kare

butan-e-azari ki mast-e-ghusl-e-aftab the

yahin pata chala ki ziist husn hai bahar hai

yahin khabar hui ki zindagi ke dukh sarab the

yahin laga ki gardishon ke zaviye badal gae

na roz o shab ki talkhiyan na vaqt ke azaab the

mire tamam dost ajnabi rafaqaton men gum

miri nazar men tere khadd-o-khal tere khvab the

main duriyon ke bavajud tere aas paas tha

mayurka ke sahilon pe main bahut udaas tha

More Poems

Leave a Comment