lazzat-e-ḳhvab de ga.e husn-e-ḳhayal de ga.e
ek jhalak men itna kuchh ahl-e-jamal de ga.e
aa.e to dil tha baagh baagh aur ga.e to daagh daagh
kitni ḳhushi vo laa.e the kitna malal de ga.e
dida-varon ki raah par kaun hua hai gamzan
vo magar apni zaat se ek misal de ga.e
is se ziyada rahzan karte bhi mujh pe kya sitam
mal-o-manal le ga.e fikr-e-ma.al de ga.e
ahl-e-kamal ko ‘nazir’ ahl-e-jahan ne kya diya
ahl-e-jahan ko kya nahin ahl-e-kamal de ga.e
Leave a Reply