Basit Bhopali
kuchh sila hi na mila ishq men jal jaane ka
sham.a ne luuT liya soz bhi parvane ka
zabt-e-fariyad ki be-sud tavaqqo dil se
zarf kyuun dekhiye TuuTe hue paimane ka
mera miTna nahin asan mohabbat ki qasam
maut hai naam tire dil se utar jaane ka
hashr tak ro.egi duniya-e-mohabbat mujh ko
silsila ḳhatm na hoga mire afsane ka
maut ki niind se insan ko jaga deti hai
jis haqiqat men zara rang ho afsane ka
is tarah mujh se muḳhatab hai zamana jaise
hosh ki fikr bhi ik farz ho divane ka
un ke andaz-e-sitam ka hai taqaza ‘basit’
ahd kar lijiye mar mar ke jiye jaane ka
Leave a Reply