Jameel Mazhari
kuchh bhi nahin hai alam-e-zarrat se aage
ik alam-e-hu alam-e-asvat se aage
milte hain smavat smavat se aage
har gaam hijabat hijabat se aage
is dahr men ham ḳhud bhi hain minjumala ḳhurafat
kis tarah nazar jaa.e ḳhurafat se aage
ai raat ke maaro tumhen kis tarah bujha.un
ik sub.h bhi ik din bhi hai is raat se aage
insan hain magar biich ki manzil men khaḌe hain
haivan se pichhe hain jamadat se aage
jo kuchh hai yahan vo hai ḳharabat ke andar
kuchh bhi nahin ai rind ḳharabat se aage
kya sochte ho zehn men vo aa nahin sakta
kya sochte ho hai vo ḳhayalat se aage
hone ko vo jaisa bhi ho ham hain to vo hoga
ḳhamoshi hi ḳhamoshi hai is baat se aage
samjhenge vahi zehn ‘jamil’ apne suḳhan ko
jaati hai nazar jin ki tabi.at se aage
Leave a Reply