Ejaz Rahmani
kitne ba-hosh ho ga.e ham log
ḳhud-faramosh ho ga.e ham log
jis ne chaha hamen aziyyat di
aur ḳhamosh ho ga.e ham log
dil ki avaz bhi nahin sunte
kya giran-gosh ho ga.e ham log
ham ko duniya ne parsa samjha
jab ḳhata-kosh ho ga.e ham log
pi ga.e jhiḌkiyan bhi saaqi ki
kya bala-nosh ho ga.e ham log
is tarah pi rahe hain ḳhuun apna
jaise mai-nosh ho ga.e ham log
shahr men is qadar the hangame
ghar men ru-posh ho ga.e ham log
kitne chehron pe aa ga.i rangat
jab se ḳhamosh ho ga.e ham log
zaḳhm paa.e hain is qadar ‘ejaz’
aaj gul-posh ho ga.e ham log
Leave a Reply