ḳhizan ki rut hai janam-din hai aur dhuan aur phuul
hava bikher ga.i mom-battiyan aur phuul
vo log aaj ḳhud ik dastan ka hissa hain
jinhen aziiz the qisse kahaniyan aur phuul
ye sab tire mire iz.har ki alamat hain
shafaq ke rang men sho.ala, lahu, zaban aur phuul
yaqin kar ki yahi hai bujhe dilon ka ilaaj
tiri vafa tiri chahat tira guman aur phuul
‘zafar’ main surat-e-ḳhushbu qayam karta huun
so ek se mujhe lagte hain sab makan aur phuul
Leave a Reply