Bano Tahira Sayeed
ḳhamosh hain ḳhamosh magar dekh rahe hain
ham dekhne valon ki nazar dekh rahe hain
tarik fazao men bhi jugnu koi chamka
aaj apni duaon ka asar dekh rahe hain
kya baat hai kya raaz bane kya ho gaya aḳhir
kyon aap ko ba-dida-e-tar dekh rahe hain
ḳhud maut se Takrane ka jin ko hai saliqa
mar ke bhi vo apne ko amar dekh rahe hain
dekha na hamen muḌ ke bhi ik baar kisi ne
ham shauq se ta-hadd-e-nazar dekh rahe hain
kya janiye is raah se kab un ka guzar ho
muddat se magar rahguzar dekh rahe hain
Leave a Reply