kaun sa tair-e-gum-gashta use yaad aaya
dekhta bhalta har shakh ko sayyad aaya
mere qaabu men na pahron dil-e-nashad aaya
vo mira bhulne vaala jo mujhe yaad aaya
koi bhula hua andaz-e-sitam yaad aaya
ki tabassum tujhe zalim dam-e-be-dad aaya
laae hain log janaze ki tarah mahshar men
kis musibat se tira kushta-e-bedad aaya
jazb-e-vahshat tire qurban tira kya kahna
khinch ke rag rag men mire nashtar-e-fassad aaya
us ke jalve ko gharaz kaun-o-makan se kya tha
daad lene ke liye husn-e-khuda-dad aaya
bastiyon se yahi avaz chali aati hai
jo kiya tu ne vo aage tire farhad aaya
dil-e-viran se raqibon ne muraden pain
kaam kis kis ke mira khirman-e-barbad aaya
ishq ke aate hi munh par mire phuli hai basant
ho gaya zard ye shagird jab ustad aaya
ho gaya farz mujhe shauq ka daftar likhna
jab mire haath koi khama-e-faulad aaya
iid hai qatl mira ahl-e-tamasha ke liye
sab gale milne lage jab ki vo jallad aaya
chain karte hain vahan ranj uthane vaale
kaam uqba men hamara dil-e-nashad aaya
di shab-e-vasl moazzin ne azaan pichhli raat
haae kam-bakht ko kis vaqt khuda yaad aaya
mere naale ne sunai hai khari kis kis ko
munh farishton pe ye gustakh ye azad aaya
gham-e-javed ne di mujh ko mubarakbadi
jab suna ye ki unhen sheva-e-bedad aaya
main tamanna-e-shahadat ka maza bhuul gaya
aaj is shauq se arman se jallad aaya
shadiyana jo diya naala o shevan ne diya
jab mulaqat ko nashad ki nashad aaya
lijiye suniye ab afsana-e-furqat mujh se
aap ne yaad dilaya to mujhe yaad aaya
aap ki bazm men sab kuchh hai magar ‘dagh’ nahin
ham ko vo khana-kharab aaj bahut yaad aaya
Leave a Reply