ju-e-ravan huun thahra samundar nahin huun main
jo nasb ho chuka ho vo patthar nahin huun main
suraj ka qahr dekhiye mujh par ki aaj tak
khud apne saae ke bhi barabar nahin huun main
main pighla ja raha huun badan ke alaav men
aur kah raha huun mom ka paikar nahin huun main
mitti safar ki pairon men ankhon men ek khvab
thahrun kahan ki miil ka patthar nahin huun main
din bhar ki bhuki pyasi chali aa rahi hai raat
kis dil se uzr kar duun ki ghar par nahin huun main
budhi rivayaton se bhare ek shahr men
yuun bas gaya huun jaise ki be-ghar nahin huun main
Leave a Reply