jo sun kar lagi zer-e-lab muskurane
ye kya kah diya tha kali se saba ne
mire sher anmol la.al-o-gohar hain
luTa.e tire gham ne kya kya ḳhazane
shafaq khil uThi champa.i arizon par
nikhara tire rang-e-ruḳh ko haya ne
raha hai vahi dil ka ehsas-e-ulfat
badalte rahe laakh karvaT zamane
mohabbat ka un ko yaqin aa chala hai
haqiqat bane ja rahe hain fasane
jhijhak kar kisi ne chura.in jo nazren
charagh-e-tamanna laga jhilmilane
kabhi ye bhi socha hai ai hansne vaalo
agar paḌ ga.e tum ko aansu bahane
vo tufan bad-e-muḳhalif kahan hai
jo uTTha tha ai ‘naqsh’ mujh ko miTane
Leave a Reply