jo halat ab hai is dil ki ye halat phir kahan hogi
ghazal kah len idhar maail tabiat phir kahan hogi
mila hai ab jo gham mujh ko rahega umr bhar dil men
jo shiddat aaj hai is men vo shiddat phir kahan hogi
abhi ik dusre ko dekh len donon nazar bhar ke
bichhadne ka hai vaqt aaya ye qurbat phir kahan hogi
milenge phir ye kahte ho kabhi vapas jo aae to
kahan aise miloge tum ye surat phir kahan hogi
juda ho kar bhi tujh se zindagi ai dost guzregi
bahar-surat magar ye khubsurat phir kahan hogi
shikayat thi tumhen ham se hamen bhi tum se shikva tha
karenge kis se phir shikva shikayat phir kahan hogi
chalen ‘masud’ hal-e-dil ab un se apna kah den ham
milegi phir kise fursat ye jurat phir kahan hogi
Leave a Reply