jo dil qaabu men ho to koi rusva-e-jahan kyuun ho
khalish kyuun ho tapish kyuun ho qalaq kyuun ho fughan kyuun ho
maza aata nahin tham tham ke ham ko ranj-o-rahat ka
khushi ho gham ho jo kuchh ho ilahi na-gahan kyuun ho
ye misraa likh diya zalim ne meri lauh-e-turbat par
jo ho furqat ki betabi to yuun khvab-e-giran kyuun ho
hamesha aadmi ka aadmi gham-khvar hota hai
yahi be-e’tibari ho to koi razdan kyuun ho
bahut niklenge roz-e-hashr tere jaur ke khvahan
sitam ka hausla duniya men sarf-e-imtihan kyuun ho
ghazab aaya sitam tuuta qayamat ho gai barpa
ye puchha tha ki tum azurda mujh se meri jaan kyuun ho
unhin ko ranjish-e-beja hai lekin hai to ham se hai
mohabbat gar na ho baham shikayat darmiyan kyuun ho
gae thukra ke mujh ko aur phir kahte gae ye bhi
nasib-e-dushmanan to paemal-e-asman kyuun ho
nai takid hai zabt-e-mohabbat ki vo kahte hain
jigar ho to fughan kyuun ho dahan ho to zaban kyuun ho
sharik-e-daur-e-mai bazm-e-adu men khaak hote ham
kisi ne rat-bhar itna na puchha tum yahan kyuun ho
tahammul kar sake kya husn-e-nazuk un nigahon ka
use main ne chhupaya hai vagarna vo nihan kyuun ho
khuda shahid khuda shahid hai kyuun kahte ho vaadon par
khuda ko kya gharaz mere tumhare darmiyan kyuun ho
jigar se kam nahin ai charagar dagh-e-jigar mujh ko
jo paida ki ho mar mar ke vo daulat raegan kyuun ho
naved-e-jan-fiza hai kya khabar qatil ke aane ki
batao to sahi tum ‘dagh’ aise shadman kyuun ho
Leave a Reply