Firaq Gorakhpuri
jise log kahte hain tirgi vahi shab hijab-e-sahar bhi hai
jinhen be-khudi-e-fana mili unhen zindagi ki khabar bhi hai
tire ahl-e-did ko dekh ke kabhi khul saka hai ye raaz bhi
unhen jis ne ahl-e-nazar kiya vo tira kharab-e-nazar bhi hai
ye visal-o-hijr ki bahs kya ki ajiib chiiz hai ishq bhi
tujhe pa ke hai vahi dard-e-dil vahi rang-e-zakhm-e-jigar bhi hai
ye nasib-e-ishq ki gardishen ki zaman makan se guzar ke bhi
vahi asman vahi sham-e-gham vahi sham-e-gham ki sahar bhi hai
tire kaif-e-husn ki jaan hai miri be-dili-o-fasurdagi
jise kahte hain gham-e-raegan vo liye hue kuchh asar bhi hai
na raha hayat ki manzilon men vo farq-e-naz-o-niyaz bhi
ki jahan hai ishq barahna-pa vahin husn khak-basar bhi hai
vo gham-e-firaq bhi kat gaya vo malal ishq bhi mit gaya
magar aaj bhi tire haath men vahi astin hai ki tar bhi hai
dam-e-hashr azal ki bhi yaad kar ye zaban kya ye nigah kya
jo kisi se aaj na ho saka vo saval bar-e-digar bhi hai
jo visal-o-hijr se duur hai jo karam sitam se hai be-khabar
kuchh utha hua hai vo dard bhi kuchh uthi hui vo nazar bhi hai
ye pata hai us ki inayaton ne kharab kitnon ko kar diya
ye khabar hai nargis-e-nim-va ki girah men fitna-e-shar bhi hai
usi sham-e-marg ki tirgi men hain jalva-ha-e-hayat bhi
unhin zulmaton ke hijab men ye chamak ye raqs-e-sharar bhi hai
vahi dard bhi hai dava bhi hai vahi maut bhi hai hayat bhi
vahi ishq navak-e-naz hai vahi ishq sina-sipar bhi hai
tu zaman makan se guzar bhi ja tu rah-e-adam ko bhi kaat le
vo savab ho ki azaab ho kahin zindagi se mafar bhi hai
jo gale tak aa ke atak gaya jise talkh-kam na pi sake
vo lahu ka ghunt utar gaya to suna hai shir-o-shakar bhi hai
koi ahl-e-dil ko kami nahin magar ahl-e-dil ka ye qaul hai
abhi maut bhi nahin mil saki abhi zindagi men kasar bhi hai
badi chiiz daulat-o-jah hai badi vusaten hain nasib use
magar ahl-e-daulat-o-jah men kahin aadmi ka guzar bhi hai
ye shab-e-daraz bhi kat gai vo sitare duube vo pau phati
sar-e-rah ghaflat-e-khvab se ab utho ki vaqt-e-sahar bhi hai
jo ulat chuke hain bisat-e-dahr ko agle vaqton men barha
vahi aaj gardish-e-bakht hai vahi rang-e-daur-e-qamar bhi hai
na gham-e-azab-o-savab se kabhi chhed fitrat-e-ishq ko
jo azal se mast-nigah hai use nek-o-bad ki khabar bhi hai
vo tamam shukr-o-raza sahi vo tamam sabr-o-sukun sahi
tu hai jis se mail-e-imtihan vo farishta hai to bashar bhi hai
na kaho taghaful-e-husn se koi kar-sazi-e-gham kare
ki jo aaj gham se nikal gai vo dua kharab asar bhi hai
tire gham ki umr-e-daraz men kai inqalab hue magar
vahi tul-e-sham-e-‘firaq’ hai vahi intizar-e-sahar bhi hai
Leave a Reply