jis pe tiri shamshir nahin hai
us ki koi tauqir nahin hai
us ne ye kah kar pher diya ḳhat
ḳhuun se kyuun tahrir nahin hai
zaḳhm-e-jigar men jhank ke dekho
kya ye tumhara tiir nahin hai
zaḳhm lage hain khulne gulchin
ye to tiri jagir nahin hai
shahr men yaum-e-aman hai vaa.iz
aaj tiri taqrir nahin hai
uudi ghaTa to vapas ho ja
aaj koi tadbir nahin hai
shahr mohabbat ka yuun ujḌa
duur talak tamir nahin hai
itni haya kyuun a.ine se
ye to miri tasvir nahin hai
Leave a Reply