Khalid Mubashshir
in dinon shaam aise aati hai
mauj-e-ḳhun men naha ke jaati hai
ek sahra mujhe bulata hai
ek vahshat gale lagati hai
pahle ham dhuup men jhulaste the
ab to ye chhanv bhi jalati hai
kitni ma.asum hai vafa apni
bevafa.i hansi uḌati hai
ghair ki baat us se kyon puchhi
us ki sachcha.i ab rulati hai
kitne ishve hain ik mohabbat ke
kitne pahlu se azmati hai
ek din e’tibar TuuTa tha
ab to har chiiz TuuT jaati hai
ḳhvab ankhon men jab bhi aata hai
ek ta.abir munh chiḌati hai
tiir kaisa tha jaane ai ‘ḳhalid’
ruuh zaḳhmon se chhaTpaTati hai
Leave a Reply