Iblis Ki Majlis-E-Shura

iblis

ye anasir ka purana khel ye duniya-e-dun

sakinan-e-arsh-e-azam ki tamannaon ka khuun

is ki barbadi pe aaj amada hai vo karsaz

jis ne is ka naam rakha tha jahan-e-kaf-o-nun

main ne dikhlaya farangi ko mulukiyat ka khvab

main ne toda masjid-o-dair-o-kalisa ka fusun

main ne nadaron ko sikhlaya sabaq taqdir ka

main ne munim ko diya sarmaya daari ka junun

kaun kar sakta hai is ki atish-e-sozan ko sard

jis ke hangamon men ho iblis ka soz-e-darun

jis ki shakhen hon hamari abiyari se buland

kaun kar sakta hai is nakhl-e-kuhan ko sar-nigun

pahla mushir

is men kya shak hai ki mohkam hai ye iblisi nizam

pukhta-tar is se hue khoi ghulami men avaam

hai azal se in gharibon ke muqaddar men sujud

in ki fitrat ka taqaza hai namaz-e-be-qayam

aarzu avval to paida ho nahin sakti kahin

ho kahin paida to mar jaati hai ya rahti hai khaam

ye hamari sai-e-paiham ki karamat hai ki aaj

sufi-o-mulla mulukiyyat ke bande hain tamam

tab-e-mashriq ke liye mauzun yahi afyun thi

varna qavvali se kuchh kam-tar nahin ilm-e-kalam

hai tavaf-o-haj ka hangama agar baaqi to kya

kund ho kar rah gai momin ki tegh-e-be-niyam

kis ki nau-midi pe hujjat hai ye farman-e-jadid

hai jihad is daur men mard-e-musalman par haram

dusra mushir

khair hai sulatani-e-jamhur ka ghaugha ki shar

tu jahan ke taaza fitnon se nahin hai ba-khabar

pahla mushir

huun magar meri jahan-bini batati hai mujhe

jo mulukiyat ka ik parda ho kya is se khatar

ham ne khud shahi ko pahnaya hai jamhuri libas

jab zara aadam hua hai khud-shanas-o-khud-nigar

karobar-e-shahryari ki haqiqat aur hai

ye vajud-e-mir-o-sultan par nahin hai munhasir

majlis-e-millat ho ya parvez ka darbar ho

hai vo sultan ghair ki kheti pe ho jis ki nazar

tu ne kya dekha nahin maghrib ka jamhuri nizam

chehra raushan andarun changez se tarik-tar

tisra mushir

ruh-e-sultani rahe baaqi to phir kya iztirab

hai magar kya is yahudi ki shararat ka javab

vo kalim-e-be-tajalli vo masih-e-be-salib

niist paighambar va-lekin dar baghal darad kitab

kya bata.un kya hai kafir ki nigah-e-parda-soz

mashriq-o-maghrib ki qaumon ke liye roz-e-hisab

is se badh kar aur kya hoga tabiat ka fasad

tod di bandon ne aqaon ke khemon ki tanab

chautha mushir

tod is ka rumat-ul-kubra ke aivanon men dekh

al-e-ceaser ko dikhaya ham ne phir ceaser ka khvab

kaun bahr-e-rum ki maujon se hai lipta hua

gaah balad-chun-sanobar gaah nalad-chun-rubab

tisra mushir

main to is ki aqibat-bini ka kuchh qaail nahin

jis ne afrangi siyasat ko kya yuun be-hijab

panchvan mushir iblis ko mukhatab kar ke

ai tire soz-e-nafas se kar-e-alam ustuvar

tu ne jab chaha kiya har pardagi ko ashkar

ab-o-gil teri hararat se jahan-e-soz-o-saz

ablah-e-jannat tiri taalim se dana-e-kar

tujh se badh kar fitrat-e-adam ka vo mahram nahin

sada-dil bandon men jo mashhur hai parvardigar

kaam tha jin ka faqat taqdis-o-tasbih-o-tavaf

teri ghairat se abad tak sar-nigun-o-sharmsar

garche hain tere murid afrang ke sahir tamam

ab mujhe un ki farasat par nahin hai e’tibar

vo yahudi fitna-gar vo ruh-e-mazdak ka buruz

har qaba hone ko hai is ke junun se taar taar

zaagh dashti ho raha hai ham-sar-e-shahin-o-chargh

kitni surat se badalta hai mizaj-e-rozgar

chha gai ashufta ho kar vusat-e-aflak par

jis ko nadani se ham samjhe the ik musht-e-ghubar

fitna-e-farda ki haibat ka ye aalam hai ki aaj

kanpte hain kohsar-o-murgh-zar-o-juebar

mere aaqa vo jahan zer-o-zabar hone ko hai

jis jahan ka hai faqat teri siyadat par madar

Leave a Comment