Hum Dhundte Hain Bagh Mein Is Gul-Ezar Ko

ham DhunDte hain baagh men is gul-ezar ko

jalva ne jis ke rang diya hai bahar ko

tum jaate ho to jaao khuda ke liye magar

le jaao apne saath na sabr-o-qarar ko

ham husn-e-itiqad se samjhe chadhae phuul

gul kar diya jo us ne charagh-e-mazar ko

di kis ne is ko ja ke naved-e-qudum-e-yar

hai nagavar baagh se jaana bahar ko

us but men nur-e-qudrat-e-khaliq hai mustatar

patthar ne kya chhupaya hai dil men sharar ko

‘mushtaq’ gham ko paas na aane de zinhar

khush khush guzar zindagi-e-mustaar ko

Leave a Comment