Abbas Qamar
ham aise sar-phire duniya ko kab darkar hote hain
agar hote bhi hain be-intiha dushvar hote hain
khamoshi kah rahi hai ab ye do-aba ravan hoga
hava chup ho to barish ke shadid asar hote hain
zara si baat hai is ka tamasha kya banaen ham
irade tutte hain hausle mismar hote hain
shikayat zindagi se kyuun karen ham khud hi tham jaaen
jo kam-raftar hote hain vo kam-raftar hote hain
gale men zindagi ke risman-e-vaqt hai to kya
parinde qaid men hon to bahut hoshiyar hote hain
jahan vaale muqayyad hain abhi tak ahd-e-tifli men
yahan ab bhi khilaune raunaq-e-bazar hote hain
gulu-e-khushk un ko bhejta hai de ke mashkiza
kuchh aansu tishna-kamon ke alam-bardar hote hain
badan un ko kabhi bahar nikalne hi nahin deta
‘qamar-abbas’ to ba-qaeda tayyar hote hain
Leave a Reply