Har Gul Se Har Khaar Se Uljha Rahta Hai

har gul se har ḳhaar se uljhā rahtā hai

dil hai apne yaar se uljhā rahtā hai

phuul ḳhafā rahte haiñ apnī shāḳhoñ se

dar apnī dīvār se uljhā rahtā hai

merī javānī kā sāthī mirā ā.īna

chāñdī ke har taar se uljhā rahtā hai

jaane merā shā.ir beTā kyuuñ aksar

daadā kī talvār se uljhā rahtā hai

log to āḳhir log haiñ un se kyā shikva

iisā kyuuñ bīmār se uljhā rahtā hai

mūrat bantī TūTtī bantī rahtī hai

fan apne fankār se uljhā rahtā hai

Leave a Comment