Gile Shikwe Ke Daftar Aa Gae Tum

Wajeeh Sani

gile shikve ke daftar aa ga.e tum

are ‘sani’ kahan ghar aa ga.e tum

kahani ḳhatm hone ja rahi thi

naya ik moḌ le kar aa ga.e tum

hansi men Talne hi ja raha tha

miri ankhon men kyuun bhar aa ga.e tum

zamana taak men baiTha hua tha

zamane bhar se bach kar aa ga.e tum

main ji lunga isi ik pal men jivan

ki jis pal men mayassar aa ga.e tum

mire siine pe apna bojh rakhna

agar banhon men thak kar aa ga.e tum

dua men haath thakte ja rahe the

abhi girte ki yaksar aa ga.e tum

hamara zarf tha so chup rahe ham

magar aape se bahar aa ga.e tum

basa-auqat tum ko bhuul rakha

magar yadon men aksar aa ga.e tum

abhi tum se hi milne aa raha tha

chalo achchha hua gar aa ga.e tum

mohabbat ki vakalat kar rahe ho

to kya ‘sani’ se mil kar aa ga.e tum