ghulam-zadon men koi ghulam hai hi nahin
hamare shahr men sach ka nizam hai hi nahin
ye log jald hi patthar men Dhalne vaale hain
yahan kisi se koi ham-kalam hai hi nahin
main dekhta huun unhen aur guzarta jaata huun
tamam chehre hain chehron ke naam hai hi nahin
tumhari marzi hai rakh lo hamen ya Thukra do
hamare paas mohabbat ka daam hai hi nahin
ye log use tiri tasvir hi samajhte hain
par us ke jaisa koi ḳhush-kalam hai hi nahin
vahan pe ḳhvabon ko ḳhairat kar ke chalte bano
jahan shu.ur-e-halal-o-haram hai hi nahin
zara si lahje ki narmi se maan ja.enge
ki bigḌe logon ka koi imaam hai hi nahin
Leave a Reply