Poet
ghabra.e jitna maut ki dil-bastagi se ham
begana utne hote ga.e zindagi se ham
kyunki badal den ne.amat-e-gham ko ḳhushi se ham
kis tarah maang laa.en tabassum kisi se ham
kuchh aisi baten siikh ga.e dosti se ham
karte nahin ab apna ta.aruf kisi se ham
kah do shab-e-firaq ke taron se Duub jaao
manus ab nahin hain kisi raushni se ham
ḳhamoshiyon ne qissa-e-gham bhi bhula diya
ab baat bhi karen to karen kya kisi se ham
ḳhud apne dil se ho ga.e begana is tarah
jaise jhijak rahe hon kisi ajnabi se ham
aḳhir ko chalne valon ne pahchan hi liya
nikle jo sar jhuka.e tumhari gali se ham
shayad isi se ashk bhi ankhon men aa ga.e
tarikiyon ko dekh na len raushni se ham
jis ne jala diye hain tamannaon ke charagh
aajiz se ho ga.e hain usi zindagi se ham
ab ‘fazl’ hasraten hain na fikr-o-nazar men zau
jaan nazr kar rahe hain baḌi bekasi se ham
Leave a Reply