Qamar Aasi
dushman se ittihad ke chakkar men paḌ gaya
har dost ab mafad ke chakkar men paḌ gaya
thoḌi jagah mili jo kisi kaḳh-e-husn men
dil saari ja.idad ke chakkar men paḌ gaya
karta raha gurez jo ik umr vasl se
ab lams ke svaad ke chakkar men paḌ gaya
ik husn-e-shandar pe kamil ghazal ke baad
sha.ir na.e mavad ke chakkar men paḌ gaya
yaksaniyat chhalakne lagi us ke sher se
jo shaḳhs infirad ke chakkar men paḌ gaya
paTTi ta.assubat ki bandhi jo ghair ne
apnon se hi jihad ke chakkar men paḌ gaya
achchhe suḳhan ka lutf nahin le saka ‘qamar’
naqqad jab inaad ke chakkar men paḌ gaya
Leave a Reply