Safi Aurangabadi
dost ḳhush hote hain jab dost ka gham dekhte hain
kaisi duniya hai ilahi jise ham dekhte hain
dekhte hain jise ba-dida-e-nam dekhte hain
aap ke dekhne valon ko bhi ham dekhte hain
be-mahal ab to sitamgar ke sitam dekhte hain
kaise-kaison ko bure haal men ham dekhte hain
hans ke taḌpa de magar ghusse se surat na bigaḌ
ye bhi ma.alum hai zalim tujhe ham dekhte hain
log kyuun kahte hain tu us ko na dekh us ko na dekh
ham ko allah dikhata hai to ham dekhte hain
baagh ki sair na bazar ki tafrih rahi
ham to barson men kisi din pe qadam dekhte hain
la.al hiire sahi tere lab-e-dandan idhar aa
toḌ lete to nahin hain unhen ham dekhte hain
shal hue dast-e-talab bhuul ga.e harf-e-saval
aaj ham hausla-e-ahl-e-karam dekhte hain
main tamasha sahi lekin ye tamasha kaisa
muft men log tire zulm-o-sitam dekhte hain
aap ki kam-nigahi husn bhi hai aib bhi hai
log aisa bhi samajhte hain ki kam dekhte hain
ham ko Thukrate chalen aap ki mahfil men adu
kya unhen kam nazar aata hai ya kam dekhte hain
chaar logon ke dikhane ko to aḳhlaq se mil
aur kuchh bhi nahin duniya men bharam dekhte hain
mera hona bhi na hone ke barabar hai vahan
dekhen jo log vajud aur adam dekhte hain
aankh men sharm ka paani magar itna bhi na ho
dekh un ko jo tiri aankh ko nam dekhte hain
ho to ja.ega tire dekhne valon men shumar
avval avval hi magar apne ko ham dekhte hain
rasta chalne ki ik chheḌ thi tu aaqa na aa
ham to ye qaul ye va.ada ye qasam dekhte hain
dekhna jurm hua zulm hua qahr hua
ye na dekha tujhe kis aankh se ham dekhte hain
aankh un ki hai dil un ka hai kaleja un ka
rat-din jo mujhe ba-dida-e-nam dekhte hain
apna rona bhi safi’ raas na aaya ham ko
us ko shikva hai ki ankhen tiri nam dekhte hain
Leave a Reply