Poet
dil-lagi ghairon se be-ja hai miri jaan chhoḌ de
maan kahna tere sadqe tere qurban chhoḌ de
ashiq-e-jan-baz kyunkar ku-e-janan chhoḌ de
apna aa ghar kis tarah sher-e-niystan chhoḌ de
ye nahin kahta ki sayyad ab mujhe azad kar
do ghaḌi ko bahr-e-gul-gasht-e-gulistan chhoḌ de
kaun kafir phir kare sajda ḳhuda ke samne
kah to baiThe mujh se vo but apna iman chhoḌ de
tang huun diq huun koi dam men nikal ja.ega dam
chhoḌ de dast-e-junun mera gareban chhoḌ de
ghair-mumkin hai jo bhulun ghar tira ai rashk-e-hur
mujh ko jannat men agar le ja ke rizvan chhoḌ de
ghamza-e-beja nahin uThte phunka jaata hai dil
garmiyan apni tu ai mehr-e-daraḳhshan chhoḌ de
phir phansun main dam-e-gesu men to kafir janiyo
chhoḌ de lillah ab o na-musalman chhoḌ de
ho na raz-e-ishq ifsha abru-rezi na ho
phuuT bahna tu agar ai chashm-e-giryan chhoḌ de
tauq phenkenge gale men misl-e-qumri saikḌon
nazuki raftar o sarv-e-ḳhiraman chhoḌ de
husn ka juuya huun muddat se main divana-mizaj
mujh ko pariyon ke akhaḌe men sulaiman chhoḌ de
yuun bhula.i dil se yad-e-mus.haf-e-ruḳhsar ‘rind’
hifz kar ke jis tarah se koi qur.an chhoḌ de
Leave a Reply