dil ke har juzv men juda.i hai
kya bala vasl ki sama.i hai
na-rasa.i sar-e-rasa.i hai
zo.af ki taqat azma.i hai
jam-o-mina pe nuur barse hai
kya ghaTa mai-kade pe chha.i hai
yuun to vo alam-ashna hai magar
ik mujhi se zara laḌa.i hai
tu mila ghair se ki ḳhaak men ham
aqibat har tarah safa.i hai
tum juda ghair se hue the kab
vajibi ta.an-e-bevafa.i hai
ai ‘qalaq’ ham se to mila kar yaar
ḳhalis ulfat men kya bura.i hai
Leave a Reply