didani hain dil-e-kharab ke rang
aah us chashm-e-pur-hijab ke rang
fasl-e-gul men paden to khuub khilen
khirqa-e-zohad par sharab ke rang
shauq-e-mai dil men lab pe hijv-e-sharab
ham pe raushan hain sab janab ke rang
nahin tauba ki khair hain jo yahi
josh-e-hangama-e-sahab ke rang
kal ke maqbul aaj hain mardud
aah is daur-e-inqilab ke rang
qabil-e-did hain visal ki shab
arzu-ha-e-kamyab ke rang
chehra-e-ashiqi hai pazh-murda
kya hue vo mai-e-shabab ke rang
khail-e-khuban se ek men bhi nahin
aap ke husn-e-la-javab ke rang
meri mayusiyon se hain paida
kashmakash-ha-e-iztirab ke rang
dil ke hathon bahut rahe hain kharab
‘hasrat’-e-khanuman kharab ke rang