Dekhti Aankhon Ne Dekha Hai Shabistanon Mein

dekhtī āñkhoñ ne dekhā hai shabistānoñ meñ

jazba marne kā abhī zinda hai parvānoñ meñ

kitnā pur-haul hai māhaul shab-e-furqat kā

ḳhuun bhī ḳhushk huā jaatā hai shiryānoñ meñ

kaam aayā na galā phāḌtā ai shaiḳh tirā

nazar aatī haiñ vahī raunaqeñ mai-ḳhānoñ meñ

sitam-e-tāza pe yuuñ shukr-e-sitam kartā huuñ

jaise ik aur izāfa huā ehsānoñ meñ

ai ‘vafā’ ahl-e-zabāñ kī hai ināyat ye bhī

ki shumār aaj hamārā hai zabāñ-dānoñ meñ

Leave a Comment