Azm Shakri
darida-pairahanon men shumar ham bhi hain
bahut dinon se ana ke shikar ham bhi hain
faqat tumhin ko nahin ishq men ye dar-badari
tumhari chaah men gard-o-ghubar ham bhi hain
chaḌhi jo dhuup to hosh-o-havas kho baiThe
jo kah rahe the shajar saya-dar ham bhi hain
bulandiyon ke nishan tak na chhu sake vo log
jinhen guman tha hava pe savar ham bhi hain
jo ḳhasta-hali men darvesh ka muqaddar thi
usi qaba ki tarah tar-tar ham bhi hain
Leave a Reply